أدرس حاليا علوم الحاسب في جامعة كانساس في أمريكا.. و بإذن الله يكون آخر ترم.

قبل سنه كلمت أحد خريجين تخصص علوم الحاسب في جامعة الملك سعود عن المواد الي أخذها... لأني دايم أسمع عن تفوق الدراسه في أمريكا و ضعفها في السعوديه... أبي أعرف حجم الفارق هذا..

قام يعدد لي المواد الي درسها... و كل ما سألته عن ماده.. يقول ايه درسناها.. و تكلم عن المشاريع الي سووها في الجامعه.. والله شي رائع جدا!! بديت أشكك في تفوق جامعات أمريكا.

و دخلت على موقع كلية الحاسب في كل الجامعتين.. كانساس و الملك سعود.. و بديت أقارن المواد..

منهج كانساس: 18 مادة حاسب... و مجموع عدد ساعاتها 58 ساعه.

الملك سعود: 27 مادة حاسب!.. و مجموع الساعات 81 ساعه!!

و كل الخطتين 8 مستويات.. يعني اربع سنين.

في جامعة كانساس عندك 14 مادة إجبارية... يعني لازم تاخذها. و في آخر سنه.. عندك الحرية في آخر أربع مواد. تختارها من بين هذي المواد:

Fundamentals of Expert Systems

Introduction to Database Systems

Software Engineering Tools

Introduction to Artificial Intelligence

Introduction to Communication Networks

Compiler Construction

Introduction to Computer Graphics

أو ممكن آخذ مادة:

Special Topics

هذي كل ترم دكتور أو دكتورين يعرضون كم مادة من عندهم. ممكن آخذهن و تحسب لي ضمن المواد الأربع الأخيره.

أو ممكن أختار المواد الأربع الأخيره من مواد الماجستير.. طبعا لازم تكون مخلص المادة الي قبلها.. مثلا اذا ودك تاخذ مادة داتا بيس متقدمه.. لازم تخلص مادة "مقدمة للداتا بيس" قبل. الجامعة عندها 17 مادة لمستويات الماجستير... و طبعا تقدر تاخذ منها مادامك مخلص الماده الي قبلها. لكن ما تنعرض كلها طبعا في نفس الترم. تلقاهم يعرضون 4 أو 5 مواد كل ترم.

و هذي الميزة جدا تعجبني لأن الواحد يقدر يخصص هالأربع مواد في مجال واحد و يكون ملم به تماما.. مثل قواعد البيانات أو أنظمة التشغيل أو غيرها.

و هذا موقع ملف ال pdf فيه الخطه الدراسيه كامله و كل المواد الي ممكن تنعرض.

http://www.eecs.ku.edu/downloads/und..._Fall_2005.pdf

بتلقون الخطط الدراسيه لهندسة الكمبيوتر و الهندسة الكهربائيه.. ما عليكم منها انزلوا شوي الين علوم الحاسب.

اذا جينا لمواد الملك سعود.. نلاقيها أكثر بكثير من مواد كانساس. و كلها إجباريه. عندك مواد قواعد البيانات و الشبكات و بناء الكومبايلر و الذكاء الاصطناعي و القرافيكس و غيرها.. كلها مواد لازم تاخذها. و أيضا ميزة رائعه الي هي مشروع التخرج.. تهيئك فعلا للعمل بعد التخرج. و هذا لسبب غريب غير موجود في جامعة كانساس.. مع ان أغلب التخصصات الثانيه عندنا يمرون خلال مشروع التخرج.

و عندكم مادتين أشوفكم تاخذونها بدري في الخطة الدراسيه.. أنظمة التشغيل و الداتا ستركتشرز (مدري وش اسمها بالعربي). أنظمة التشغيل فعلا غريبه تاخذونها بدري.. لأنها من جد معقده.. لولا الله ثم الدكتور الخرافي الي درسني فيها كان مدري وشلون أعديها. كان بينقل من الجامعه و بيسوي خير فينا قبل ما يمشي... جا الاختبار النهائي و انا ماني فاهم شي.. وجالس أحسب احتمالية الرسوب. المهم يوم دخل قال يالله.. 75% من درجة الاختبار هديه.. يعني لو ما تحل شي بتاخذ C.. الأسئلة عليها 25%.. عشان ما أظلم الي مذاكر و فاهم. عملنا هيصه في الفصل يومها!!

معليش طلعت عن الموضوع هههههههه

نرجع للمادة الثانيه.. الداتا ستركتشرز.. هذي فعلا منطقية تجي بدري.. كانساس حاطينها في المستوى السادس.. و الملك سعود في المستوى الثالث.. أعتقد بدري شوي بعد.. يمكن تنفع في الرابع.



بصراحه الله يوفقكم والله الخطه صعبه ههههههههه. موادكم واجد. بس فعلا تخرجك فاهم تقريبا في كل مجالات الكمبيوتر. و أغلبها مواد تطبيقيه تفيدك في العمل بعد التخرج.

و العكس صاير في جامعة كانساس.. أغلب موادهم نظرية. هذي أعتقد تفيدك أكثر إذا بتكمل ماجستير و دكتوراه.



في الأخير.. لا تحسب الفرق شاسع بين جامعتك و جامعات أمريكا.. بالعكس قد يتفوق خريجها على عشرات من خريجين جامعات أمريكا. و هذي مقارنه بين المواد الي تقدمها الجامعتين و لكم الحكم. قد تتفوق كانساس بالجانب النظري.. و أنك تقدر تخصص آخر أربع مواد في مجال معين. لكن الملك سعود تتفوق في الجانب التطبيقي.. و انك تتخرج و تكون ملم بجميع مجالات الحاسب.. و هذا راح يفيدك في انك تعرف وش أكثر شي أعجبك و تحدد مجالك في الماجستير.

ياليت أعرف آرائكم بالنسبة للمنهج.. أو أي اقتراحات للتحسين.. سواء بإضافة أو حذف مواد.. أو تغيير مكانها الى مستوى أدنى أو أعلى.. خاصة الطلاب الي خلصوا سنتين أو ثلاث لأن خبرتهم أكبر في هالمجال.

تحياتي لكم.

حيا الله أم عبد العزيز

ايه نعم CS = Computer Science.. علوم الحاسب.

فعلا للأسف صعب نقارن باسم المادة. لكن أعتقد بيكونون متقاربين في الكثافه اذا كانوا نفس عدد الساعات. و أغلب مواد الجامعتين 3 ساعات. مجموع الساعات الكلي 126 عندنا.. و 138 عندكم. العدد الكلي متقارب.. لكن بما أنه أقل عندنا.. فممكن تكون الماده أدسم بشوي عندنا.

بالنسبه لأنظمة التشغيل.. سمعت عن ناس في السعوديه يدرسون نفس كتابنا:

Operating System Concepts

الي غلافه ديناصورات

و درسنا منه أول 13 تشابتر (ما عدا تشابتر 4). هل هو نفس الي تدرسونه؟

تحياتي لك و شرفينا في البلوق

هلا بيك أخوي هههههههههههه وش فيك معصب.

جامعتي مجرد مثال ما حكمت على جامعات أمريكا كلها... و أخذتها كمثال لأني أعرفها زين.

مدري وش قصدك بالمثال "المثالي"؟ هل نقارن الملك سعود بأفضل جامعه في أمريكا ولا وش تقصدك؟

جامعة كانساس جامعة محترمه و عاديه يعني ماهي من النخبه. عشان كذا رأيت انه مناسب مقارنتها مع الملك سعود.

" للأسف الكثير من الطلاب والطالبات يتظاهرون بسعادتهم او اقتناعهم بالمكان الذي يدرسون فيه بغض النظر عن عيوبه حتى لو كان الاسوا على الإطلاق ولا يرغبون في تحذير اخوانهم من المجيئ الى نفس المكان حتى لايتبين للغير مدى سوء حظهم .. !!"

ههههههههه تقصدني يخوي؟ لا والله جامعتي تهبل.. جو وش زينه.. و خضار و عشب تتبطح فيه.. و مطر كل يوم و الثاني يالله من فضلك.

و حتى لو تجيها من الناحية الاكاديميه.. فهي من أفضل 100 جامعة في أمريكا. لا و بعض التخصصات من أفضل 10 جامعات.

يعني الجامعه حلوه والله.. سواء جو ولا دراسه. و حتى المدينه "لورنس"... صغيره جامعيه.. و من أفضل 20 مدينه جامعيه في أمريكا.

عشان كذا اخترتها أخوي.. لانه نوعا ما تعبر عن الجامعات المتوسطه في أمريكا.. يعني لا هي النخبه مثل هارفارد و طقتها.. ولا هي جامعه أي كلام.


و بالعكس يخوي.. أشوف جامعتنا تهتم بالنظري أكثر من الملك سعود الي تهتم بالتطبيقي أكثر... حتى هم عندهم مشروع تخرج و حنا لا.. يعني يشتغلون أكثر. و موادهم التطبيقيه أكثر. و مع ذلك جامعتنا تخرج ناس يتوظفون في أي مكان. فأعتقد خريجين الملك سعود لهم مكانتهم.

تحياتي لك..و ياليت تعلمني كيف أنطق اسمك.. من الصبح أناديك أخوي هههههههه