 |
 |
 |
 |
 |
 |
 |
 |
|
|
||||||||
|
|||||||||
|
|
|||||||||
3rd September 2008, 02:59 AM
|
|||||
|
|||||
FAQ's ... عيادة الأسئلة المتكررة ...
نظراً لأن موضوع الاستفسارات السابق يعد ( كنزاً ) مهماً ملئ بالاستفسارات التي تتكرر كثيراً وفيه من الفائدة الشئ الكثير ، يسعدني وفريق العمل أن نقدم لكم هذا الموضوع الذي وضعنا فيه الاستفسارات التي وردت في ذلك الموضوع بعد التنقيح والتنسيق و التصنيف وحذف المكرر . تم تصنيف الأسئلة إلى عدة أصناف حسب نوعها ، وهي مقسمة إلى : - الأسئلة المتعلقة بالسنة الأولى و الثانية : هنا - الأسئلة المتعلقة بالسنة الثالثة والرابعة هنا - الأسئلة المتعلقة بسنة الأمتياز هنا - أسئلة متعلقة بالطب كـ دراسة ، نظام ، قبول وتحويل ، طلبة الثانوي واسئلتهم هنا - أسئلة عن الاختلاط وما إلى ذلك هنا - أسئلة متعلقة بحياة ما بعد التخرج والتخصصات هنا نود أن نشكر مشرفنا السابق Dr. Death على إسهاماته الجبارة في موضوع الاستفسارات القديم و التي أمدتنا بمادة غنية جداً لعمل هذا الموضوع. و أخيراً ، أرجو من الله أن ينفع بهذا العمل . مع تحيات فريق العمل : RAYAN ALBALLAA Dr. optimistic pure spirit لـهـ Blaze ـيب الخط الساخن 
التعديل الأخير تم بواسطة : خالد القمّاش بتاريخ 9th September 2008 الساعة 11:21 PM. السبب: تعديل الروابط |
| هؤلاء الأعضاء 18 يشكرون RAYAN ALBALLAA على مشاركته | ||
born 2 do it (5th September 2008), Bright Future (3rd September 2008), DoMah (3rd September 2008), Dr. optimistic (4th September 2008), Dr.Mo3ath (19th September 2008), k8er-GiRl$ (6th September 2008), moca latieh (8th September 2008), mr.B (17th September 2008), No For Despair (3rd September 2008), pure spirit (3rd September 2008), whatever it takes (25th November 2008), أحــمــد (20th September 2008), الانتظار (3rd September 2008), الملاك الصغير (5th September 2008), د.الهاشمية (3rd September 2008), د.مجهول (3rd September 2008), عالمة المستقبل (4th September 2008), نـــــــــــــــور.. (4th September 2008) | ||
|
3rd September 2008, 03:01 AM
|
|||||
|
|||||
|
رد: FAQ's الأسئلة الأكاديمية الأكثر تكراراً ...
الأسئلة المتعلقة بالسنة الأولى و الثانية 1- الدوام في سنه اولى و ثاني من كم لكم كل يوم ؟ سمعت انه الى الساعه 5 كل يوم صحيح ؟ الدوام الرسمي من الساعة 8 - 4 ، لكنكم غالباً تطلعون على الساعة 3 ، وإذا عندكم عملي آخر شئ في اليوم فتطلعون على الساعة 2 أو 2 ونص ، أحياناً تضطرون تقعدون إلى الساعة 4 // 2- بغيت اسالكم عن الخطة الدراسية للسنة الأولى كيف ؟ سنه أولى طب بشري : 120 شرح علم الأنسجة عدد الساعات = 3 (سنوي) 121 شرح علم التشريح الظاهري (1) عدد الساعات =7 (سنوي) 123 شرح علم الأجنة عدد الساعات =2 (سنوي) 103 عرب التحرير العربي عدد الساعات =2 (الترم الثاني) 103 سلم النظام الاقتصادي في الإسلام عدد الساعات =2 (الترم الأول)104 سلم أسس النظام السياسي في الإسلام عدد الساعات = 2 (الترم الثاني) 141 كيط كيمياء حيوية طبية (1) عدد الساعات = 8 (سنوي) 105 كطب علم الوراثة الطبية عدد الساعات = 1 (الترم الثاني) 131 فسل علم وظائف الأعضاء (1) عدد الساعات = 10 (سنوي) ملاحظات: -حاولت اجيب التغييرات اللي صارت على الخطة في السنتين الاخيرات وان شا الله ما غيروا شي جديد.. - كل يوم سبت من الساعة 8 الى الساعة 8:30 فيه quiz ... -كل مجموعة لها قائد (Group Leader ) وهو اللي يراجع الاقسام ومسؤول عن كل شي وحتى عن تنزيل المحاضرات وهو اللي يمثل المجموعة كلها وانتم تختارونه .. // 3- يقولون سنة اولى وثاني اصعب شي ؟ كل واحد حسب تجربته وحسب اجتهاده بالنسبه لي احسن سنه واسهلها ,,اولى ورابع,, والاصعب سنه ثاني ,, بس سنه ثالث ضغط نفسي كبير سنه اولى بس تحتاجين تتاقلمين عالدوام ,, وتنظمين وقتك ,, وتذاكرين اول باول . // 4- هل الكويزات عليها درجات تحسب مع الامتحانات؟ ايه الكويزات عليها درجات تحسب مع الامتحانات , على الكويزات خمس درجات بالترم الواحد ، بعض الاقسام اربع درجات وممكن بعض الاقسام يسوون لكم في الترم الواحد 3 كويزات والمطلوب كويزين,,الثالث يكون بونس كرما منهم ,,, // 5- ماهو اصعب ما تواجهه الطالب المستجد اثناء دراسة الطب ؟ أصعب شي بالطب المناهج من حيث طولها وصعوبتها نفسها . ثاني شي طول الدوام . بس إذا عرفت تنظمين وقتك إن شاء الله بتمشين تمام ... // 6- انا سمعت انه فيه دراسة من اول يوم في الطب والدوام يبدأ من 8 طيب كيف اعرف مكان المحاضرة ومن وين اخذ الجدول وهل نجي بالسكربز او بالثوب في اليوم الاول وهل اجيب اللابكوت ؟ اول يوم ( للأولاد والبنات ) فيه دراسة وتبدأ اول محاضرة الساعة 9 ، لانه في الايام العادية من 8 -9 اوقات كويز ,,, تعال لابس سكرب واللاب كوت مو ضروري ، تعال بدري وخذ جدولك من مكتب شؤون الطلاب اللي على يمينك اول ما تدخل من البوابة حقت الكلية ,,, // 7- هل تدخل مواد الاعداد العام مثل العرب والسلم في المعدل العام حق التخرج ؟ كل شي تدرسه يدخل في المعدل العام حق التخرج // 8- الحين اللي يحمل مادة زي الامبريو عليها 3 ساعات كيف يصير وضعه؟؟ مادري البنات عندهم صيفي بنظام السنوات او تنزل السنة الجاية ؟ اذا رسبتي .. يحددون لكم وقت لاختبارات الدور الثاني وتكون في اجازة الصيف ( في نهاية الاجازة بالعادة ) وتختبرين في المادة واذا نجحتي فيها ( موب مهم الدرجة 100 مثل 60 ما تفرق ) يسجل لك درجة مقبول في المادة وتروح عنك درجة الرسوب ويسجل لك في السجل الاكاديمي ( د2 ) يعني ناجحة في الدور الثاني .. واذا رسبتي في الدور الثاني في مادة ساعاتها اكثر من 4 ساعات وما تنزل لك كل مواد السنه اللي بعدها بس تقدرين تنزلين مواد من السنه اللي بعدها (غالبا ما يخلون ساعاتك تعدي 30 ساعة) طبعا اذا عندك واسطه ممكن ينزلون لك مادة ام 10 اسعات مع مواد سنه ثاني .. اما اذا كانت المادة اللي رسبتي فيها (رسبتي في الدور الثاني ) ساعاتها اقل من 4 ساعات تنزل مع مواد السنه اللي بعدها عادي وفيه مواد احيانا اذا رسبتي فيها يطلب منكم القسم حضور 50 بالمية من المحاضرات فقط على حسب اتفاقكم مع القسم .. طبعا هالقوانين تنطبق على السنوات من سنه اولى الى ثالث .. بس اذا نجحتي من ثالث الى رابع ما يسمح لك تحملين اي مادة حتى لو مادة ام ساعة وحده .. يعني بالعربي ممنوع تدخلين سنه رابع ( الدورات الدريبية ) وعندك اي مادة من السنوات اللي قبل حتى لو كانت مادة ام ساعة وحده ... معلومة مهمة : الطب ما فيه ترم صيفي .. فيه دور ثاني .. الدور الثاني ما فيه دراسة فيه اختبار فقط . واذا نجحتي فيه ما يحسب لك الرسوب موب مثل الترم الصيفي في الكليات الثانية اللي يحسب الرسوب حقهم ويعتبر الصيفي مادة جديدة تضاف على الساعات الدراسية .. الدورات التدريبية ( سنه رابع وخامس ) ما فيه دور ثاني الدورة اللي ترسبين فيها تدرسينها في الصيف ويحسب عليك الرسوب اللي رسبتي فيه طبعا ..
|
| هؤلاء الأعضاء 12 يشكرون RAYAN ALBALLAA على مشاركته | ||
..اميرهـ باخلاقها.. (12th September 2008), Dr. Conan (22nd September 2008), Dr.jojo (16th September 2008), No For Despair (3rd September 2008), pure spirit (3rd September 2008), Rafif (3rd September 2008), الانتظار (3rd September 2008), الملاك الصغير (5th September 2008), د.الهاشمية (3rd September 2008), د.مجهول (3rd September 2008), ريـــــم (8th October 2008), نـــــــــــــــور.. (4th September 2008) | ||
|
3rd September 2008, 03:11 AM
|
|||||
|
|||||
|
رد: FAQ's الأسئلة الأكاديمية الأكثر تكراراً ...
الأسئلة المتعلقة بالسنة الثالثة والرابعة // 1- في أي سنة تدرس مادة الباطنة؟ تدرس في ثالث طب (رابع جامعة) ، المادة مكونة من 10 ساعات و هي من أطول مواد كلية الطب لأن تخصص الباطنة من أكثر التخصصات تشعباً و تعمقاً. // 2- الحين تغير نظام الباطنيه الى اوسكي ، ما معنى " أوسكي " ؟ الاوسكي معناه انك تمر على اكثر من محطه في الاختبار وكل محطه فيها دكتور يختبرك يعني نفس الدكاترة تمر عليهم انت واخوياك اللي يختبرون معك ونفس الحالات بتمرون عليها .. ( المحطة عبارة عن غرفة مريض يعني تدخل على مريض وتطلع من مريض .. وكل محطه لها وقت معين اذا خلص الوقت تروح للمحطة اللي بعدها )
|
| هؤلاء الأعضاء 7 يشكرون RAYAN ALBALLAA على مشاركته | ||
No For Despair (3rd September 2008), pure spirit (3rd September 2008), Rafif (3rd September 2008), الانتظار (3rd September 2008), الملاك الصغير (5th September 2008), د.مجهول (3rd September 2008), نـــــــــــــــور.. (4th September 2008) | ||
|
3rd September 2008, 03:12 AM
|
|||||
|
|||||
|
رد: FAQ's الأسئلة الأكاديمية الأكثر تكراراً ...
الأسئلة المتعلقة بسنة الأمتياز // ما هي مسؤوليات طبيب الامتياز؟ و ما الذي يطلب منه؟ و كيف يمكن التعامل مع سنة الامتياز؟ يفترض سنه خامس تمهد شوي للوضع ... انتي حضرتي في الراوند وشفتي الوضع ... دايم يكون فيه نقاش في العلاج .. يعني نادرا انك تسوين الراوند لحالك وانتي انتيرن .. يمكن وانتي ريزيدنت بس انترن لا نادر .. والمسألة تعود راح تتعودين شلون تطبقين اللي درستيه على اللي تشوفينه ... راح توصلين مرحلة وانتي انتيرن راح تعرفين وش راح يكون البلان قبل ما يقولونه لأغلب المرضى خاصة اذا اشتغلتي فترة كافية في هالقسم .. وشغلة الانتيرن في الغالب .. اول شي يعتمد على القسم .. 1- تحضرين الاجتماع الصباح اذا كان القسم عندهم اجتماع صباحي .. وتجاوبين على الاسئلة فيه اذا سألوك (نادرا يسألونك ).. 2- تشوفين المرضى اللي لك ( راح تقسمين المرضى مع الانتيرنز اللي معك ) راح تمرين على كل مريض وتكتبين البروقرس نوتس ( راح تتعلمين شلون تكتبين البروقرس نوتس بكل الطرق ) طبعا البروقرس نوت فيها هستوري وفحص وبلان وراح تعرفينها بعدين .. .. 3-يفترض تكونين شفتي كل مرضاك وكتبتي نوتس كاملة لكل مريض وعرفتي النتائج حقت المختبر اللي طلعت جديدة ..والادوية اللي هو عليها وكم له فترة وهو عليها .. قبل بداية الراوند .. 4- خلال الراوند اللي راح يكون فيه (ممكن طلاب +اطباء الامتياز + طبيب مقيم + اخصائي + استشاري )يفترض انك تقديمن الحالات حقتك اذا اول مرة تقدمين الحالة تقديمينها تقديم كامل ( هستوري وفحص وتحاليل وكل شي ) طبعا بعد ما تكونين عرفتي كل المعلومات عن المريض وشفتي الملفات القديمة حقته .. او اذا كان المريض عندك من فترة راح تقدمين البروقرس نوت حقك يعني وشي الاشياء الجديدة اللي صارت من اخر مرة شفتيه فيها .. مع مختصر عن الحالة ( لأن الفريق يعرفون المريض خلاص ) 5- بعد ما تقدمين الحالة راح يكون فيه نقاش بسيط عن الحالات ويمكن يكون فيه اسئلة للانتيرن هالشي يعتمد على التيم .. ويعضهم يسأل الانتيرن عن البلان اللي يقترحه .. ومن هالكلام وفي الاخير يقرر الاستشاري البلان المناسب والانتيرن يكتب ( الاخصائي والاستشاري ما يمسكون القلم ) واحيانا يكتب الريزيدنت لازم تتعلمين سرعة الكتابه والسبيلينق الصح لأنه يدعسون في الكلام خاصة في اسماء الادوية اللي بعدها راح يكون تجاري وراح تستغربين اسمها .. ويفترض يكون معك جهاز بالم علشان تعرفين الاسماء التجارية وترسخ في بالك بسرعة .. وبعدها تروحون للمريض اللي بعده .. 6- اغلب الاقسام ( موب كلهم ) يكون عندهم يوم واحد في الاسبوع ( او يومين ) اسمه قراند راوند .. هالقراند راوند يفترض بالانتيرن يقدم الحالات اللي عنده من الصفر وراح يكون فيه نقاش دقيق معه واسئلة علمية كأنه اختبار ويجتمع كل استشاريين التيم او القسم ... يعني بالعربي قـــــلـــق ح3 7- بعد الراوند .. بعض المستشفيات تطلب من الانتيرن يكتب الدستشارج سمري وراح يشيك عليه الريزيدينت او يمكن ما يشيك عليه .. 8- احيانا يجي حالات جديدة بعد الراوند تكون تبع التيم حقك ( اليكتف ادمشنز ) راح تكونين مسؤولة عن كتابة الكلاركنق ( هستوري وفحص ) طبعا هالحالات تقدرين تقسمينها مع الانتيرن اللي معك يعني احيانا يكون عندك مثلا 4 حالات والانتيرن اللي معك عنده حالايتن مثلا فهو اللي مفروض ياخذ حالات الاليكتف في ذاك اليوم لأن حالاته اقل وكذا .. اهم شي التفاهم بين الانتيرنز في القسم اللي هم فيه راح يكون معك في الغالب 2 او 3 انتيرنز اتفقوا بينكم ووزعوا الشغل وتقدرون تغطون على بعض .. 9- اذا خلصتي شغلك كله امسكي بيجرك في يدك لأنه في الغالب راح يدق .. النيرسيز يمكن يعلمونك عن شكوى معينه لمريض من مرضاك او يطلبون منك تكتب شي في الملف ( قلق) ح3 10- بعض البروسيجرز يسوونها الانتيرنز .. مثل سحب الدم ( بعض المستشفيات يطلبون الانتيرن يسويها ) ..اي في لاين... حقن ادوية معينه لازم الطبيب يحقنها ..دبرايدمنت بسيط في الجراحة ..فوليز كاث .. استيك تاب كنا نسويها .. بس عادي قولي للريزيدينت يسويها وموب مقصر .. @نقاط مهمة ... - دائما اذا ما عرفتي شي دقي على الرزيدينت وراح يساعدك .. محد راح يلومك لأنك انتيرن توك جديدة .. - في المناوبة بتلاحظين انك تتورطين وبيجيك مواقف ما تدرين وش تسوين فيها .. دقي على الرزيدينت عادي وراح يساعدك بس لازم يكون عندك فكرة كاملة عن حالة المريض وموب تدقين وكل ما سألك عن المريض قلتي لحظة اشوف الملف.. لحظة اسأل الممرضة .. ترا بعضهم يتضايق ..... وكل شي سجليه في الملف علشان تخلين مسؤوليتك وتكتبين في الملف ان المريض اشتكى من كذا وكذا والهستوري كان كذا وكذا والفحص كان كذا وكذا ودقيت على الرزيدينت فلا الفلاني وقال لي اكتبي له كذا وكذا .. - حاولي تختارين التيمز اللي الاطباء اللي فيها متعاونين وحبيبين ويصير الراوند رهيب وما فيه ضغط .. - هالنقاط اللي حطيتها تكون مجوده في اغلب الاقسام اللي فيها تنويم مثل الباطني والاطفال والجراحة .. ممكن تختلف النقاط او ينلغي بعضها حسب المستشفى وحسب القسم .. - بعض الاقسام في بعض المستشفيات يطلب من الانتيرن ينزل للعيادات اذا كان عندهم زحمة .. ويخلونه يمسك عيادة .. - بداية الامتياز راح تخافين شوي وما تدرين وش السالفة ولا تعرفين طريقة الشغل وبتحسين بضغط نفسي .. لا تخافين هالاحساس راح يختفي شوي شوي يمكن تلاحظين انك ارتحتي نفسيا وبديتي تستمتعين بعد حول 8 اسابيع ( ركزي على الدقة بس ) -اول مناوبات راح تستلمينها راح تخاااافين وراح ترتبكين .. عادي طبيعي ح3 بتتعودين .. - راح تجيك حالة نفسية من صوت البيجر لأن غالبا ما يجي من ورا دقته الا المصايب .. حاولي تغيرين نغمته من فترة للثانية علشان تخففين التوتر معنا واحد من الشباب لو يدخل مطعم ويسمع صوت في المطعم ( طن طن ) ينقز يحسبه بيجر _ الرزيدينت هو المسؤول عن الانتيرن اللي عنده فحاولي تحسنين علاقتك معهم .. وهو اللي راح يشرف على الشغل وراح يشتغل معكم وراح يشيك على شغل الانتيرنز وممكن يقسم الشغل معكم .. // بالنسبة للكلاركنق,, مين بيراجع بعدي الفحص ؟ اذا الادميشن جاي من الاي ار راح يكون الرزيدينت شايف المريض قبلك في الاي ار وكاتب هستوري بسيط وكل الفايندنقز ... وغالبا محد يشوف وش كاتبه اصلا ههههههههه اهم شي تعبين شي في الفايل .. بالنسبة للاليكتيف ادمشنز انتي راح تكونين اول وحده تفحص المريض من اول ما يجي المستشفى بس تقدرين تفتحين الملف القديم حقه وراح تلقين النوتس حقت العيادة اللي شافوه فيها وفيها الفايندنقز ح3 والدياقنوسيز عادة يكون مكتوب ..واذا المريض محول من مكان ثاني شوفي الفورم حق التحويل فيه كل شي هستوري وفايندقز ..وعادة كل مريض يدخل لازم تشوفين الملف القديم حقه راح تلقين فيه كل شي تبينه خاصة اذا لقيتي دستشارج سمري مكتوب له في الاخير .. // بالنسبة لتبديل المناوبات ، هل يجب إعلام المسؤول؟ لا ما يحتاج تعطينه خبر ... عندكم تشيف انتيرن (يكون انتيرن معكم مثل القروب ليدر ودايم يكون من الشباب ما يخلونه من البنات )تعلمينه ( علشان تخلين نفسك من المسؤولية لو اللي بدلتي معه ما جا في الاونكول ) او احيانا حتى ما يحتاج اهم شي اللي غيرتي معه يكون تكانه وما يسحب ويكون فيه جدول مناوبات معلق غيري الاسامي فيه وغيري الاسامي في الجدول المعلق عند النيرسز ... وبالعادة اصلا يكون فيه بيجر خاص بالاونكول .. فما عليهم من اللي يجي اذا دقوا على الرقم اهم شي احد يغطي احيانا كان فيه شباب يقسمون الاونكول بينهم وياخذون نص اونكول كل واحد .. // المناوبات الليلية موجوده بالنسبة للبنات؟يعني لازم مجبره انام في المستشفى اذا توظفت؟ خلال سنه الامتياز تبدا المناوبات ... (((ولااااااازم تناوبين )) يعني غصب عليك واذا قلتي منيب مناوبة يعيدونك في الروتيشن ويخلونك تناوبين واذا عيتي يعيدونك ثالثة لين تناوبين يعني مستحيل تخلصين الامتياز وانتي ما ناوبتي ... ولازم تنامين في المستشفى ... بعد سنه الامتياز تقدرين تختارين تخصص ما فيه مناوبات ... ومدة المناوبة من بداية دوامك الساعة 8 الصباح ويستمل على الى نهاية الدوام ويستمر بعد نهاية الدوام لين يبدا دوامك من اليوم الثاني الساعة 8 الصباح وتبدين دوام اليوم الثانية على طول (يعني بتجيبين معك ملابس لليوم الثاني) لأنك بتنامين في المستشفى (هذا اذا عطوك فرصة تنامية وما ازعجوك في اخر الليل وغالبا يتنامين 3 ساعات بالكثير طبعا على حسب القسم) ومن اليوم الثاني بعضهم رحمونك يخلونك تطلعين على 10 الصبح وبعضهم يخلونك تطلعين على 12 الظهر واذا كان قسمكم ما فيه احد غيرك بتقعدين لين العصر .. // هل صحيح ان عدد ساعات المناوبة ممكن توصل إلى36 ساعة ؟ صحيح غالبا ... الا اذا رحمك الدكتور الاخصائي اللي معك في الفريق المعالج ممكن يسمح لك تطلع بدري شوي .. لأن المناوبة اصلا تبدا من 8 صباح اللي هو بداية دوامك وتستمر في الدوام الى 4 ونص اللي هو نهاية الدوام بس بما انك مناوب ما تطلع تكمل الدوام وتقعد في المستشفى وتنام في المستشفى (هذا اذا تركوك تنام ولا دقوا عليك مليون مرة ) وتبدا الدوام من اليوم الثاني الساعة 8 الصباح وتستمر في الدوام الى نهايته الساعة 4 ونص العصر... لإيه اقسام عندهم سياسة البوست كول يعني يخلونك تطلع 12 الظهر في اليوم الثاني يعني يسامحونك في اربع ساعات ونص وبعض الاقسام يقول لك اذا خلصت شغلك من اليوم الثاني وشافوك تعبان ولا نمت يقولون رح البيت .. يعني بالعربي مدة المناوبة تتراوح من 32 ساعة ومع الرحمة 28 ساعة ... (وفي مناوبات الخميس والجمعة )(وبعض الناس يناوب في الاعياد وانت وحظك على حسب الجدول ) // هل البنات يناوبون بعد ؟؟!! ايه يناوبون ... ما فيه فرق في التعامل مع الدكاترة او الدكتورات كلهم مثل بعض ما فيه امتيازات لأي احد على الثاني // المناوبة تكون كم مرة خلال الشهر / الأسبوع؟ عدد المناوبات يختلف من قسم لقسم ... وعلى حسب اللي ياخذون اجازات .. ويتراوح بين 3 الى 7 في الشهر واحيانا ممكن اكثر اعرف ناس في الجراحة وصلت معهم المناوبات الى 11 مناوبة في الشهر والمعروف ان مناوبات الجراحة قشرا والسبب ان اغلب الاطباء في اجزاة واللي ما طلعوا اجازة كلوها .. وبعض الاقسام ممكن توصل 15 يوم في الشهر .. خاصة في المناوبات اللي تصير في البيت وتمر على المستشفى يمكن مرتين او 3 مرات في اليوم بس ... وانت وحظك .. // كيف يختلف نظام الشفتات عن المناوبة ؟ الشفت عبارة عن 8 ساعات او 12 ساعة فقط .. يعني في الطب فيه تخصص واحد نظامه نظام شفتات ما فيه مناوبات هو الطواريء والشفتات فيه الشفت الاول من 8 الصباح الى 4 العصر .. الشفت الثاني من 4 العصر الى 12 الليل الشفت الثالث من 12 الليل الى 8 الصباح .. وكل طبيب ياخذ شفت واحد كل يوم فقط ... ولازم يخلص 18 شفتات في الشهر والباقي اجازة .. وهو ما يختار ايام الاجازة وانما ياخذها حسب الجدول والروتا الموضوعه من القسم .. ولو نشوف الممرضات اللي في اجنحة التنويم نظامهم شفتات من 7 الصباح الى 7 الليل وبعده يجون ممرضات ثانين يبدون شفتهم من 7 الليل الى 7 الصباح .. اما المناوبة تكون طويلة مرة ومتعبة .. بحيث الطبيب يداوم الساعة 8 الصباح ويقعد في المستشفى بعد الدوام الرسمي اللي هو 4 ونص يعني يقعد في المستشفى طول اليوم ويكون هو الطبيب المسؤول عن كل المرضى اللي مجال تخصصه اي واحد يجيه مشكله يدقون على الدكتور .. وبالعادة فيه طبيب مناوب يغطي اجنحة التنويم والمرضى المنومين وفيه طبيب مناوب ثاني يغطي الطواريء والحالات اللي تجي الطواريء ويحولونها عليه لأنها في مجال تخصصه (مثلا لو تجي حالة ألتهاب زايدة على طول يحولونها على الطبيب المناوب في تخصص الجراحة العامة وينزل الطواريء يشوفها ويدخلها العمليات على طول لدرجة ان فيه طبيب مناوب في الجراحة اعرفه سوا في يوم واحد 6 عمليات زايدة (طبيب مقيم) غير حالات الاصابات والحوادث اللي تاخذ وقت طويل في الطواريء .. ) .. طبعا يستمر الطبيب في المناوبة لين اليوم الثاني وينام في المستشفى وفي بعض التخصصات النوم صعب لأنهم يدقون كثير وما يخلون الواحد ينام بس يهدى الشغل شوي بعد الساعة 1 الظهر في بعض التخصصات ويمدي الطبيب ينام على الاقل ساعتين ... اذكر فيه مرة ما نمت الا عشر دقايق ما خلوني انام وداومت اليوم الثاني الى 4 العصر .... طبعا اذا جت الساعة 8 الصبح تخلص مناوبة الدكتور بس ما يروح للبيت يبدا دوامه عادي كأنه يوم عادي وبعض المستشفيات يخلونه يطلع على الساعة 12 الظهر (يقال لهم راحمينه) وبعض المستشفيات يخلونه يطلع النهار بعد الجولة حقت المرضى (الراوند) خاصة اذا فيه طبيب ثاني معه ممكن يغطيه في القسم حقه ويشيل الشغل عنه .. طبعا المناوبة مزعجة مرة ومتعبة الى ابعد درجة في تخصصات الجراحة العامة وفي تخصص الباطني جدا متعبة وتخلي الواحد يكره حياته خاصة في مستشفيات معينه مثل الجامعي والعسكري ووالحرس احيانا خاصة الطبيب المناوب اللي يغطي اجنحة التنويم .. يعني المناوبة تقريبا راح تستمر من 28 ساعة الى 32 ساعة ما تطلع فيها من المستشفى .. فيه مرات مسكت فيها مناوبات 3 ايام ورا بعض لأنه فيه نقص في القسم يعني الوضع احيانا يكون صعب .. بس حطي في بالك فيه تخصصات مناوباتها في البيت وما تمر على المستشفى الا مرة او مرتين في اليوم وممكن تنام فيها بس بيكون عندك مناوبات كثيرة .. // ماذا تعني هذه المسميات: registrar senior registrar معناها طبيب اخصائي ... (اللي معه بورد = مخلص برنامج تخصص) senior registrar = اخصائي اول ... الظاهر اللي يكون معه خبرة او معه الزمالة وما بعد لقوا له مكان علشان يصير استشاري ... // انا طالب طب بجامعة الخليج العربي بالبحرين مبتعث من وزارة التعليم العالي السؤال هنا عن كيفية التقديم لسنة الامتياز وطريقته ومتطلباته وماهي المستشفيات التي تقبل الطلاب المبتعثين؟ وما افضلها؟ تتصل على مكتب اطباء الامتياز في كلية الطب جامعة الملك سعود وفي جامعات ثانية وراح يفيدونك ..
|
| هؤلاء الأعضاء 7 يشكرون RAYAN ALBALLAA على مشاركته | ||
..اميرهـ باخلاقها.. (12th September 2008), No For Despair (3rd September 2008), pure spirit (3rd September 2008), الانتظار (3rd September 2008), الملاك الصغير (5th September 2008), د.الهاشمية (3rd September 2008), د.مجهول (3rd September 2008) | ||
