تحذير لمن يريد أن يدخل لكلية الطب في الكلية ال .... الأهلية

[=ROZA=]

السلام عليكم ورحمة الله وبركاته


هنا سأتحدث بكل صدق عن الكلية العالمية الأهلية في الرياض .. وأحذر من يريد أن يدرس طب ليكون طبيب
سواءً من خريجي الثانوية أو من خريجي السنوات التحضيرية في كافة مناطق المملكه ..

لكن من البداية اللي يبغى يدرس طب مو من رغبه وبس يبغى يلعب .. يدخلها


الموضوع أنا سأنشره في عدد من المنتديات التعليمية .. لكي ما ينخدع أحد مثل ما انخدعنا إنا ..

كان ودي أكتب هذا الكلام من زمان لكن للأسف انشغلت ولا قدرت أكتب

أنا طالبة انتقلت إلى الكليات العالمية ودرست الطب البشري فيها .. بعد أن درست السنة التحضيرية في إحدى الجامعات خارج مدينة الرياض .. وفرحت جدا بأني راح أتخلص من الغربه وأرجع أدرس عند أهلي ..

قابلوني الجامعة بكلام مزيف , وبإن كليتهم عالمية وبها من أعضاء التدريس من تتمناهم جامعة هارفرد !! ههههههه

المهم .. انصدمت بالواقع .. وعرفت إن ماعندهم إلا الكلام الفاضي
وأنهم كلية تجارية أهم شئ ربح العديد من ضحايا السنة التحضيرية في الرياض وغيرها

أول المشاكل فيها .. عدم وجود مكتب قبول وتسجيل
بس فيها 5 موظفات 4 منهم أردنيات ووحده سعودية شكل
وفيها كم وحدة يسمون نفسهم دكتورات .. وحده دكتورة كيمياء , تدرس كيمياء عضوية وكيمياء عامة وبايوكيمستري
والثانية تدرس أحياء
والثالثة حقت فيزياء تجيهم جزئيء نسيت وش اسمها بس يقولون البنات انها كانت في جامعة الملك سعود بالموحد ورسبت نص شعبتها وطردوها الجامعة
وفيه استاذة مايكرو بايولوجي .. ما أدري أيش متخرجة وأتوقع مامعها ماجستير !!
وفيه حقت حاسب وسلم وعرب وحقت كرتيكال ثنكنق وبهيفريال ساينز .. بس هذولي يلقون في أي مكان وسهل تلقين أحد زين !!

نجي للمواد الطبية ..

الفصل الأول :

هيستولوجي وأمبريولوجي .. دكتور طبيب باكستاني خطيييير وممتاااز يدرس في احدى كليات الطب في الرياض لكن كليتنا للأسف طردوه .. مدري ليه يمكن عشان راتبه كثير , وحاولنا نقولهم يرجعونه بس رفضوا
ولأن الدكتور انزعج من عدم وجود النظام بالجامعه

أناتومي : ( للفصلين ) دكتور وطبيب ممتاز وشرحة مافي منه .. لكنه بدأ الفصل الثاني يسب في الجامعه .. والظاهر صار شئ بينه وبين الدكتور حسين عثمان ( صاحب الجامعة ) .. وهكذا كل واحد يسب في الثاني .. وحنا الضحيه

فارما كولوجي : دكتور سعودي شرحه بطل وأمين .. ويجي يشرح ويطلع وماله علاقه بأحد

فسيولوجي : دكتور .. اكتشفنا مؤخرا إن معه دكتوراه بايولوجي .. يعني مو هيومن فسيولوجي !!!
وشرحه خايس وماحد يفهم .. أعطانا نهاية التيرم 300 سؤال نذاكر منها وجاب منها 100 هههههه .. المشكلة الدرجات طلعت على كيفه !!


الفصل الثاني :

هذا الفصل جاء دكاتره جدد معهم عقد مع الجامعة .. دكتور البودي سيستم + دكتورة المايكروبايولوجي

مادة البودي سيستم : هذي المادة كأنها بلوكات لكن مصغره .. محاظره وحده في الأسبوع لكل قروب .. القروب 20 بنت
كان الدكتور متحمس معنا .. لكن أبدن أنا ما ارتحت له ولا لأسلوبة .. لأنه وقح نوعا ما ومسوي لي فيها أنا الدكتور اللي شخصيتي قوبة .. وعرفنا إن هالدكتور ممرض وما خذ دورات في الفزيولوجي والبايوكيمستري والأناتومي !! عاد كيف ما أدري .. لكن عنده خبره بالمستشفيات .. لأنه دائما يتكلم عن الأخطاء اللي فيها .
بدينا أول شهرين بالكارديوفاسكيلر .. اممم طبعا بالنسبه لي مافهمت ولا شئ .. لأني ما ارتحت للدكتور وماوثقت في المعلومات اللي يعطينا .. وطبعا أخطأت أنا بأني كنت ما أذاكر أول بأول .. واختبرنا الفاينل فيه وكانت الدرجات شينة لكنه رفعنا 10 درجات لكل طالبة ..
وبعدين لمدة شهر واحد بدينا في الريسبايراتوري سيستم .. الدكتور والله أعلم ما كان يعرف فيه شئ أخذنا بس النيومونيا وتأسف مننا المحاظره اللي بعدها انه ماعرف يوصل الموضوع زين .. وأخذنا الأزما شرحها لنا دكتور جايبينه من مستشفى التخصصي .. وكان يحسبنا الدكتور مرررره نعررف .. وحنا ماندري إيش السالفه إلا بعض البنات .. وأول محاظره في البلوك أعطانا هو والدكتور حق الفزيولوجي مراجعة .. وآخر محاظرتين أعطانا دكتور الفارما .. الفارماكولوجي حق الريسبايراتوري .
.
المشكله إنهم أوهمونا بهاذه الماده بأننا راح نكون ثلاث أرباع أطباء بعدها , وكل شئ مادرسناه في المواد الثانية قالوا لنا راح تاخذونه في البدي سيستم ..
صح إنه 3 بدي سستم .. بس خلصنا أهم سستمين ونص البنات بس معهم معلومات حقت الاختبار
والمشكله إن الدكتور يقول أنا راح أدرسكم كل البدي سيستم بلحالي , إذا الريسبايرتوري حاس فيه كيف بالسيستمز الباقيه

مادة المايكرو : دكتوره معها بكالوريس بس !! قليل اللي يفهمون منها .. وكل شوي تكرر إن المايكرو مايكفيه إلا كورسين .. وانتم كيف راح تخلصونه بكورس واحد .. لكن ماندري أيش نقول .. حنا نطالب وهي تطالب لكن مافيه إلا كلام الدكتور الكبير

مادة الباثولوجي : دكتور وطبيب باثولوجي يشتغل في مستشفى .. ويجي يدرس من دون إذن من مستشفاه
شرحه جيد نوعا ما لكن نفس مشكلة المايكرو .. المقرر لنا انه بس كورس واحد وسمستر واحد .. والباث يبي له وقت أكثر
فصار الدكتور يعطينا إياه دش بداية التيرم كنا تقريبا 40 طالبة تقلصنا وصرنا 10 طالبات أو أقل .. كل البنات حذفوا المادة .. لأن اختبار الميد تيرم كان صعب بقوه .. وقليل اللي نجحو
وهذا الدكتور خلاص بيلغي عقده مع الجامعة .. لأنه قالنا إنه تعب , وإن الوضع حوسه .. وكثير طالبات وطلاب اشتكوا منه ومن اسئلته الصعبه

وفيه مادة البايوكيمستري درستنا حقت الكيمياء العضوية وحقت الكيمياء العامة .. ونجحنا كلنا بدرجات كويسه .. لأنها مرره ترااعي وتعيد نفس الأسئلة شرحها على قد حالهاا


***************



المهم الفكره اللي أبغاهاا توصل إن الجامعة راح توهمكم بأنها شئ قوي وكلية عالمية . لكنهم للأسف يحسبون الجامعة مبنى وكراسي وبروجكتر رخيص !
نسوا .. أنهم يتفقون مع أعضاء هيئة تدريس قوية .. وقادرة إنها تشرح وتعطي بكل ذمة وضمير ..

.. شايفينا سعوديين .. وبنظرهم إن كل واحد في بيته بير بترول .. ف قاعدين يضحكون علينا .. وعلى أهالينا

المشكلة إن ما أحد يقدر يوقف هذي الجامعة لأن عندها واسطة قويه مره مررره مرره ..
لكن نقدر إننا نسوي شئ بأن ماحد يدخلهاا ..


إذا اضطر واحد ودخلها .. لأزم يكون ذكي ويحول الأشياء السيئة اللي حولة إلى أشياء في صالحه , ويحط في باله إنه راح يدرس نفسه في البيت وراح يتعب , وإن شاءالله بيجيب معدل عالي لأنها نوعا ما الجامعة تعطي درجات ..

أما إذا أحد يبي شهادة ومايهمه طريقة الدراسه فأتوقع هذي الجامعة تصلح له

أنا والله هذا الكلام ما أقوله لا لمصلحة .. ولا لشئ .
لكن يشهد ربي إن هذا اللي واجهته في السنة اللي راحت .. وهذا الكلام كله من وجهه نظري أناا .. وأتمنى أي طالب أو طالبه درس في العالمية .. يجي ويحط رأيه في الموضوع عشان نحذر اللي يبوا يدخلوها



أتمنى ماينحذف الموضوع .. لأننا مانقدر نسوي شئ إلا هالموضوع .. مانقدر نشتكي ولا نقدر نمسك أشياء على صاحب الجامعة لأنه ذكي مرره ,, وعارف للشعب السعودي وخابزهم وعاجنهم


وآسفة لكل الطلاب والطالبات اللي راح يكملون بالعالمية .. وأقول مو كل من يدرس فيها سئ ..
بالعكس هم ناس حدتهم الظروف وصاروا في هذي الجامعة التجارية ..
مشاء الله بعض زميلاتي الطالبات شعله من النشاط ونيتهم لدراسة الطب صالحة , لكن زي ماقلت الظروف حدتهم يدرسون فيها ومالقوا غيرها ..

[نيوتن]

كلام كبير والله

[beero..]

ماشاء الله ..

مشكوره عالنصيحه اختي ..

جزاك الله الف خير ..

لكن حبيت اقول حاجه بسيطه وعامه ..

( اهي وقفت على ذي بس ) ..

خليها على الله ..

تقبلي مروري ..

[B!do]

الله يعطيك العافيه

[طموحي الجنون]

الله يجزاك خير يارب,

كثير يسأل عن كليات الاهلية اللي تدرس الطب بالرياض

وربي يسعدك ويوفقك ماقصرتي اعطيت الناس فكرة عنها

عشان ماحد يتورط

[~كورنيليا~]

يعطيك العافية بجد

والحمدلله على كل حال

بس ممكن استفدتوا وتعلمتوا كيف تعتمدون على نفسكم اكثر

وحتى بالجامعات الحكومية مو كل دكتور تفهمين منه

بس ماانكر انو كلهم معهم شهادات عالية

الله يسعدك ويوفقك يارب

[pure spirit]

هذه الكليات الأهلية للأسف

[=ROZA=]

نيوت
شكرا على مرورك



beero..
إي والله صادقه كل شئ الحين عاثي فيه الفساد والطمع
المفروض الناس اللي تشوف ماتسكت


b!do
وياك


طموحي الجنون
إي والله لازم ننبه الناس عنها


كورنيليا
إي والله تعلمنا درووووس
من ناحية الدروس استفدت بس من دكتورين بسسس
أنا درووس بالحياة استفدت دروووس كثييره.كيف أتعامل مع الناس النصابه وأسلك لهم وكيف احرجهم واسكتهم
لكن بالنسبة للجامعات الحكومية .صادقة انه فيه كتير دكاتره ماتفهي منهم , لكن يشفع لك انك خريجة جامعة حكومية
والجامعة الحكومية تتكفل بتدريبك وبالامتياز مو زي الأهليه



pure spirit
إي والله .. لو إنهم يشتغلون بذمه وضمير كان يربحون يمكن أكثر من شغلهم هذا

[مجهول 426]

بمجرد بعد سنة ثالث تدرسون بكابلان وتختبرون USMLE


بتصيرون افضل ناس متاسسين صح بالمملكة


ما يفرق البكالوريوس من وين تاخذوه اهم شي القاعدة الطبية قوية


ولا تشيلون هم بس خلصوا ثالث وادخلوا كابلان وادرسوا عشان USMLE


سواء كنتم تبون امريكا او لا لان الاعداد لهالاختبار يخلي الانسان طبيب بحق ويخلي قاعدته قوية ومتينة



هذا الوضع مو بس بجامعتكم حتى ب سعود كثير عندنا دكاترة شهادات بدون تدريس ولا شرح



وفقكم الله

[=ROZA=]

مجهول 426

صحيح كلامك
لكن ليه كيذا تفتح الجامعات ومخرجاتها من الأساس معروف انها سيئة !

[saleh.ksu]

لا حول اللللله
الكليات الاهلية دمار

[=ROZA=]

مانبغى نعمم ..
مو كل الكليات الاهليه دمار

عندك ابن سينا بجده و كلية الرياض للأسنان والصيدله
وجامعة الأمير سلطان
أتوقع انها جيده

[البروفيسور ahmad]

أختي اعذريني انا درسة فيها وعكس كل كلامك انا ماروج للكلية ولاا لي مصلحة فيها

[Dr. Khalid Al Qahtani]

حرام يخرجو اطباء للمستقبل بهذه الطريقة !

[d z e k o]

اعتقد كلام مجهول يريح البال شوي

يعني انتم توكلوا على الله وحاولوا تدرسون عشان بكرا مو عشان الاختبار

و تساهيل ان شاء الله الين تخلصون سنة ثالث

بالتوفيق