حومة فكر

ستّل جناحه ثم حام
يرقى على متن الهوا
يزفه بعيدٍ و انا
محدود في حد النظر

له بالهوا شَفّ و مرام
يلعب مع الغيمه سوا
وانا جناحٍ لي واطير
والارض صارت لي مقر

طيري ضرب جوّ الهيام
و لو دعيته ما إلتوى
عزّي لمن طيره غدا
ولا له من أمره مفر

فكري تغشّاه العسام
أمسيت وفكري ماضوى
الارض قَفر من الونس
والليل من فرحي قُفر

شبّيت ضوّي بالظلام
في صحصحٍ ذيبه عوى
مالي انيس إلا النجوم
او نور وضّاح القمر

خالي وكنّي في زحام
قلبي تلهّب و أنشوى
ماعاد أميّز بالحشا
وإلا على ضو الجمر

وين انت ياداعي سلام
وين انت يا بايع دوا
ردّوا لي النومه ترى
بالعين جلاّد السهر

دوّرت بالشده حزام
ولا لقيت اللي قوى
يالله دخيلك ما لقيت
اللي نشد به الظهر