منتديات تجمّع طلاب و طالبات جامعة الملك سعود

Barho0o0om

كتبت 21st January 2010 في 06:55 PM بواسطة Dr.Nefo (في مثـل هذا اليوم)

السلام عليكم ورحمة الله وبركاته

شخباركم عساكم بخير

كعادتي كل اربعاء ارجع سعيد من الكلية ومتشقق وابي اطلع حرة كرف كل الاسبوع بالكلية .. طلعت ورجعت غفيت لي شوي بالبيت .. بعدها قمت ورحت لخوياي وسهرنا كالعادة سوا لين نص الليل بعدها رجعت ونمت

لكن هالمرة نمت وحرصت اني اقوم بدري مو زي كل مرة احاول انام كثر ماقدر ...

اللي يسأل عن السبب .. السبب انه اليوم زيارة اخوي الغالي " ابراهيم " بالعسكرية .. واللي لنا تقريبا اسبوعين ماشفناه من يوم مادخل معسكر الخمس واربعين يوم

طلعنا بعد صلاة العصر مباشرة ..طبعا كلمناه قبلها وسألناه وش يبي .. فكان جواب الملازم ابراهيم " ابي كتكات وببسي "

مدري وش يحس فيه بس مايخالف جبناله الكتكات واخذنا عدتنا ومشينا

طبعا الوالدة كان ضايق خلقها لانها ماراح تجي معنا ..بس كويس ماجت لاني شفت ام واحد من الطلاب جاية ومن ورى السور تناظر ولدها وتكلمه جوال .. ضاق خلقي مرة ورحمتها وبنفس الوقت استسخفت نظامهم الغبي " الزيارات للرجال بس ..!! " ... المهم على شان امي مايضيق صدرها خطرت في بالي فكرة اني اخذ الكاميرة معي واصور ابراهيم من اول ماشفناه لين اخر الزيارة .. وهذا اللي صار

اترككم مع الصور

هذي اول ماشفنا ابراهيم من بعيد

هذي صورة لبرهوم وهو يكلم الوالدة عسى الله يحفظها

ابو حمييد جازت له صلعت ابراهيم

هذي صورة لعائلة حبيييتهم

الأب جايب شجرة العائلة كلها يسلمون على اخوهم

واخيرا جا مفرق الجماعات " المسؤول عنهم " وبدأ يصارخ ويقول انتهت الزيارة وينادي المستجدين بمصطلحاتهم العجيبة ... ناظرته قلت بعقلي قبل شوي تتبسم بوجيهنا طلع وجهك الصدقي ياتسلب

سلمنا على برهوم ورجعنا للبيت طبعا امي جالسه ضايق خلقها لانها ماشافته وبس سولفت معه .. جيت نقزت عندها واعطيت الوالدة الكاميرة وجلست تتمقل الصور صورة صورة ياحبيلها

ووبس .. كان يوم مميز جدا .. يمكن بدايته كان شوي صعب خصوصا اول ماسلمت على اخوي وشفت ملامحه تغيرت ودمعت عينه .... لكن باقي الزيارة كان كله ضحك وناسة وكل شوي اذب على صلعته العجيبه وعلى تدريباتهم اللي تهد الحيل ..

عسى الله يحفظه ويرجعه سالم لنا ويحفظ كل من يعز عليكم